Webs de voda

Que confirmen eles,
non os persigades vós.

Unha web para a vosa voda que recolle quen vén, quen non come que e quen colle o autobús. Vós recibides a lista ordenada. Sen chamadas, sen follas de cálculo, sen preguntar tres veces por WhatsApp.

Contarnos a vosa voda Ver que inclúe

Lista para enviar en dúas semanas. Prezo cerrado antes de empezar.

Exemplo

Casamos

Marta & Diego

6 · Xuño · 2027

—días
—horas
—min

Pazo de Riomao

Cerimonia ás 13:00 na capela do pazo. Despois, aperitivo nos xardíns e banquete no salón principal.

Cerimonia13:00
Aperitivo14:30
Banquete16:00
Barra libre19:30

Por que fai falta

O que ninguén vos conta antes de empezar

Cento vinte convidados son cento vinte conversas. E as que peor se levan non son as de "virás?", senón as de "ti comías sen glute ou era o teu irmán?" tres semanas antes.

Sen web

  • Preguntades un a un e apuntades no móbil
  • As alerxias pérdense entre mensaxes
  • Vinte persoas pregúntanvos o mesmo do bus
  • Cambiades unha hora e hai que avisar a todos
  • O catering pídevos o número final e non o tedes

Con web

  • Confirman soos, cando lles vén ben
  • Cada alerxia queda escrita ao lado do seu nome
  • Horarios, mapa e hoteis están na web
  • Cambiades algo unha vez e véno todos
  • Descargades a lista e pasádeslla ao catering

Que leva dentro

Todo o que vos van preguntar, xa contestado

Cada sección responde a unha pregunta que vos farían por teléfono. Se a vosa voda necesita algo que non está aquí, engádese.

Confirmación de asistencia

Con acompañantes, menú de neno e quen vén só á cerimonia.

Conta atrás

Os días que quedan, na portada. Sinxelo e sorprendentemente efectivo.

Como chegar

Mapa, aparcamento, horarios do autobús e teléfono dos taxis.

Onde durmir

Hoteis cerca, con prezos e o código de desconto se o negociastes.

A vosa historia e as fotos

Como vos coñecestes, a pedida, e unha galería que crece coas fotos de despois.

Regalo, con discreción

Número de conta ou lista, na súa propia páxina. Ninguén ten que preguntalo en voz alta.

Peticións de cancións

Que cada convidado pida a súa. Ao DJ chégalle a lista feita.

Código de vestimenta

Etiqueta, paleta de cores suxerida e os avisos que ninguén di: a herba, o tacón fino, o frío da noite.

Saber quen a viu

Cantos convidados entraron, se confirmaron e desde onde. Sen cookies, así que a ninguén lle salta un aviso de consentimento o día da voda.

En varios idiomas

Se tedes familia fóra ou convidados doutro país, a web tradúcese.

O voso lado

A lista, feita soa

Mentres eles confirman, a vós vaise enchendo unha táboa. Podedes mirala desde o móbil cando queirades e descargala en Excel para o catering, o autobús ou quen a necesite.

Exemplo do que veriades — 6 de xuño de 2027
ConvidadoVénAcompañaAlerxiasBus
Carmen Vilar OteroSi1Sen gluteIda e volta
Antonio Lema RíosSi1—Pola súa conta
Uxía Ferreiro PazSi2 (1 neno)Alerxia froitos secosSó ida
Roi Castro NogueiraNon poderá———
Sabela Moure CidSi—VexetarianaIda e volta

112 de 120 contestaron. 96 quedan a comer, 8 alerxias, 61 prazas de autobús. Os nomes son inventados.

Calendario

Cando convén tela

Non fai falta que a web estea desde o primeiro día, pero si antes de repartir as invitacións: é onde vai impresa a ligazón.

8 meses

Save the date

Abonda coa portada, a data e o sitio. Que vaian apartando a fin de semana.

4 meses

Coas invitacións

A web xa completa. A ligazón ou o QR vai impreso na invitación de papel.

2 meses

Peche de confirmacións

Un recordatorio aos que faltan e xa tedes o número para o catering.

Despois

As fotos

A galería énchese coas fotos do día e a web queda como recordo.

Canto custa

Canto custa a vosa

Non custa o mesmo unha web de portada e confirmacións que unha con galería, tres idiomas e peticións de cancións. Contádesme como é a vosa voda e pásovos un prezo cerrado por escrito. Se non vos encaixa, non pasa nada.

  • Dominio, aloxamento e certificado incluídos ata a voda
  • Cambios ilimitados de horarios, textos e fotos
  • Queda en liña un ano despois, coas fotos
  • Deseño propio, a xogo coas vosas invitacións
Pedir orzamento

Tres vodas, tres maneiras

Están rematadas e pódense abrir: entrade, confirmade unha asistencia falsa, mirade como se ve no móbil. Dicídenos cal se parece máis á vosa e empezamos por aí.

Pazo

Pedra, ouro vello e letra con serifa. Para pazos, fincas e vodas de tarde longa.

Entrar

Botánica

Marfil, salvia e barro. Para vodas ao aire libre, no campo ou na praia.

Entrar

Editorial

Negro, branco e moito aire. Para quen queira algo sobrio e moderno, sen flores.

Entrar

Ver os catorce estilos

Dúbidas

O que nos preguntades

Os nosos convidados son maiores, van aclararse?
É a dúbida máis habitual e por iso a confirmación é unha soa pantalla, con letra grande e sen rexistro nin contrasinal. Ábrese desde a ligazón da invitación e énchese en trinta segundos. Aínda así, sempre queda xente que prefire chamarvos: para eses podedes confirmar vós a man desde o panel, e quedan na mesma lista que o resto.
Fai falta poñer a web na invitación de papel?
É o que mellor funciona. Imprímese a ligazón curta e un código QR, e quen teña móbil entra apuntando a cámara. Se xa tedes as invitacións deseñadas, adáptome ao formato que usedes para que o QR encaixe co deseño en vez de parecer un parche.
Como explicamos o código de vestimenta sen quedar mal?
É xustamente para o que serve ter unha web. Na invitación pon "etiqueta formal" e punto; na web explícase con calma, cunha paleta de cores suxerida e os avisos prácticos que por escrito soan raros pero agradécense: que hai herba e o tacón fino crávase, que pola noite refresca, ou que o branco deixámoslle á noiva. Dito na web é información útil; dito por teléfono a cada convidado, unha lista de normas.
Pódese saber quen entrou pero non confirmou?
Si, e é do máis útil que ten. Vedes quen abriu a web e quedou a medias, que adoita ser quen se despista, non quen non quere ir. Con iso o recordatorio vai só a quen fai falta en vez de aos cento vinte.
E se cambiamos a hora ou o sitio a última hora?
Cambiádelo na web e todo o mundo ve o novo ao entrar. Se o cambio é gordo, pódese avisar aos que xa confirmaran. Isto é xustamente o que non se pode arranxar cando a información só está impresa en papel.
A web é pública? Non queremos que a vexa calquera.
Podedes poñerlle un contrasinal sinxelo, o mesmo para todos os convidados, que vai impreso na invitación. Tamén se lle di a Google que non a indexe, así que non aparece nas buscas. E o número de conta para o regalo pode quedar nunha páxina aparte, só accesible desde dentro.
Que pasa coa web despois da voda?
Queda en liña un ano máis, incluído. É onde acaban as fotos do día e por onde a xente as descarga sen ter que pasalas por WhatsApp. Pasado o ano, ou a renovades ou vos dou todo o contido descargado para que o gardedes.
E os datos dos convidados?
Son vosos e só vosos. Están nun servidor europeo, non se comparten con ninguén nin se usan para nada máis, e cando pechedes a web bórranse. A páxina leva o seu aviso de privacidade explicando exactamente isto, porque estades recollendo datos de saúde cando preguntades por alerxias.
Casamos en cinco semanas. Chegamos?
Coa portada e as confirmacións, si: iso pode estar en menos de dúas semanas se me pasades os datos rápido. O que non cabe en cinco semanas é unha web con galería grande, varios idiomas e deseño feito desde cero. Dicídeme a data e dígovos con franqueza que chega e que non.

Falemos

Contádenos a vosa voda

Coa data, o sitio e canta xente sodes xa podo dicirvos que necesitades e canto custa. A primeira conversa non compromete a nada.

WhatsAppO máis rápido. Adoito contestar o mesmo día. Ver o resto de webs que fagoRestaurantes, negocios, casas rurais e a medida.

Ao premer ábrese WhatsApp coa mensaxe xa escrita. Vós decidides se a enviades. Esta páxina non garda ningún dato.